« S'ensuivent les Hystoyres rommaines. Prologue. Une chascune [personne] qui raison a et entendement en soy se doit à despener et excercer... Au commencement doncques de nostre procès, nous ensuyvons en termes compendieux la manière du traicter de Titus Livius quant à sa première décade. Et puis secondement, nous ensuyvons Lucan, Orose et aultres hystoriographeurs qui traictent la matière de la seconde décade de Tytus, laquelle nous n'avons pas en usaige, car elle traicte de la première guerre punique, dont icellui Titus ne fait aulcune mencion. Tiercement, nous revenons ensuyvir icellui Titus pour sa tierce décade, qui traicte de la seconde guerre punique que maintint le duc Hanibal de Cartage encontre les Rommains. Quartement, nous ensuivons Titus en sa quarte décade, là où il est traicté de la guerre macédonique. Et puis finablement, nous ensuivons Lucan, Suétone, Saluste et aultres qui porsuyvent l'istoire rommaine jusques au temps que l'empire dévola à Charles le Grant, qui fut empereur de Romme et roy de France »