« Cy commence la table de ce present livre intitulé l'istoire ancienne de Troye la grant, ouquel sera traictié et redigé au long le tres grant et tres superflus estat, noblesse et cituation d'icelle cité, du roy Priant, filz de Laomedon, de son tres noble parage, enfans et lignaiges, et de leur tres renommée et excellent chevalerie, de la destruction aussi et desolacion d'icelle, quant et quelz princes furent par Troyens et Greyois illec assemblez et convenus, quans et quelz princes furent tant d'une part que d'autre mors, mutillez et occis, de la royne Panthasilée et de tout son effort, de sa fin et de sa mort, et tout en la forme et maniere qu'elle fut trouvée en l'aumaire de Saint Pierre d'Oriente en langaige grejois et du grejois fu mise en latin et depuis fut par ung venerable et excellent acteur translatée et mise du latin en françoys »